TÜRKMENISTANYŇ UKRAINADAKY ILÇISI KIÝEW ŞÄHERINDÄKI MAGTYMGULY ADYNDAKY KITAPHANASYNA GÖRNÜKLI TÜRKMEN ŞAHYRY MAGTYMGULY PYRAGYNYŇ DÜRLI DILLERDÄKI ESERLER ÝYGYNDYLARYNY GOWŞURDY

Görnükli türkmen şahyry we akyldary Magtymguly Pyragynyň doglan gününiň 300 ýyllygy mynasybetli geçirilýän dürli çäreler dowam etdirilýär. 

Şü gün, 2024-nji ýylyň 5-nji awgustynda Türkmenistanyň Ukrainadaky Ilçisi Toýly Ataýewiň Kiýew şäherindäki Magtymguly adyndaky kitaphanasynyň direktory Ýelena Zubar we kitaphananyň işgärleri bilen duşuşygy geçirildi. 

Türkmenistanyň Ukrainadaki Ilçihanasy eýýäm 50 ýyldan gowrak wagt bäri türkmeniň beýik şahyry Magtymgulynyň adyny göterýän Kiýew şäheriniň Swýatoşinskiý etrabynyň medeni we bilim edarasyna aýratyn hormat goýýar we üns merkezinde saklaýar. Mälim bolşy ýaly, kitaphanada adybir muzeý hereket edýär. Bu ýerde beýik şahyr we onuň çuňňur pelsepewi dünýäsi, türkmen halkynyň taryhy we medeniýeti bilen baglanyşygy hakykatdanam duýmak mümkinçiligi bar, sebäbi muzeýde şu ýubileý ýylynda Türkmenistanyň Medeniýet ministrligi tarapyndan üsti doldurylan türkmen halkynyň baý mirasynyň we el hünäriniň önümleriniň ajaýyp nusgalary giňden görkezilýär.

Kitaphanada görnükli şahyr Magtymguly Pyragy we onuň döredijiligi barada köp dürli edebiýatlar bar. Bu edebiýatlaryň üstüni doldurmak maksady bilen, ynha şu gün türkmen tarapy Magtymguly adyndaky kitaphana bardy we täze edebiýatlary sowgat etdi. Bu edebiýatlar Magtymguly Pyragynyň ukrain, iňlis, nemes, fransuz, ýapon, rumyn we täjik dillerindäki goşgular ýygyndysyny öz içine alýar, hem-de olar Kiýew kitaphanasy üçin Türkmenistanyň daşary ýurtlardaky diplomatik wekilhanalaryndan jemlenildi. 2024-nji ýylda Aşgabat şäherinde neşir edilen Magtymguly Pyragynyň doglan gününiň 300 ýyllygy mynasybetli Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar instituty tarapyndan taýýarlanan «Magtymguly» atly kitabyň iňlis dilindäki nusgasy bolsa kitaphananyň gymmatly hazynasyna hakyky goşant boldy.

Berlen edebiýatlaryň arasynda “Magtymguly Pyragy. Ylham” atly şahyryň goşgularynyň ukrain diline terjimeleriniň doly ýygyndysy aýratyn bellärliklidir. Bu kitabyň tanyşdyryş dabarasy şu ýylyň maý aýynda geçirildi, ýöne az wagtyň geçendigine garamazdan neşir eýýäm şygyrýetçileriň arasynda meşhurlyk gazandy.

Şeýle hem, kitaphana ukrain görnükli şahyry we ýazyjysy Taras Şewçenkonyň türkmen dilindäki goşgular we poemalar ýygyndy neşiri hem gowşuryldy.

Mälim bolşy ýaly, şu ýylyň maý aýynda Aşgabat şäherinde Magtymguly Pyragynyň ýadygärliginiň hem-de «Magtymguly Pyragy» medeni-seýilgäh toplumynyň açylyş dabarasy geçirildi, hem-de bu seýilgähiň çäginde dürli ýurtlaryň nusgawy şahyrlarynyň we klassikleriniň heýkelleri oturdyldy. Şol heýkelleriň arasynda iki halkyň dostlugyny alamatlandyrýan görnükli ukrain akyldary we şahyry Grigoriý Skoworodanyň ýadygärligi hem bar.

Şeýlelikde, mümkinçilikden paýdalanyp Ilçihana tarapyndan Magtymguly Pyragynyň we Grigoriý Skoworodanyň heýkelleri, hem-de ÝUNESKO-nyň Bütindünýä mirasynyň sanawyna girizilen, Beýik Ýüpek ýolunyň ugrunda ýerleşýän Türkmenistanyň taryhy we medeni ýadygärlikleri şekillendirilen surat eserleri kitaphananyň gaznasyna sowgat edildi.

Magtymguly adyndaky kitaphananyň direktory Ý.Zubar we onuň agzybir işgärleri kitaphananyň işjeňligini ünsden düşürmeýändigi üçin türkmen tarapyna hoşallyk sözlerini aýdyp, kitaphananyň we muzeýiň fonduny täze edebiýatlar we täsin gymmatlyklar bilen yzygidertli doldurylýandygy, hem-de şü günki bahasyna ýetip bolmajak berlen sowgatlar üçin özleriniň çuuňur minnetdarlygyny bildirdiler.