TÜRKMENISTANYŇ UKRAINADAKY WE MOLDOWA RESPUBLIKASYNDAKY ILÇISI MOLDOWA RESPUBLIKASYNYŇ SÖWDA-SENAGAT EDARASYNYŇ ÝOLBAŞÇY DÜZÜMI BILEN IKITARAPLAÝYN HYZMATDAŞLYGY ÖSDÜRMEK BOÝUNÇA MESELELERI ARA ALYP MASLAHATLAŞDY

02.04.2025ý. senede Moldowa Respublikasynyň Söwda-senagat edarasynyň binasynda Türkmenistanyň Ukrainadaky we Moldowa Respublikasyndaky Ilçisi Toýly Ataýewiň bu edaranyň Prezidenti Sergeý Harýa we wise-prezidenti Mihaý Bylba bilen duşuşygy geçirildi.

Türkmen Ilçisiniň Kişinýow şäherine gulluk iş saparynyň çäklerinde geçiren bu duşuşygynyň dowamynda taraplaryň arasynda söwda we ykdysady hyzmatdaşlygy ösdürmek barada meseleler ara alnyp maslahatlaşyldy. Munda geljegi uly we işewür toparlaryň arasynda ikitaraplaýyn hyzmatdaşlygy işjeňleşdirmek meselelerine aýratyn üns berildi.

Soňky ýyllarda iki ýurduň arasyndaky söwda-haryt dolanyşygynyň derejesiniň käbir durnuksyzlygy görkezendigi bellenildi. Özara söwda dolanşygynyň görkezijilerinde türkmen harytlarynyň eksportynyň düzümini esasy mineral ýangyçdan, ýaglardan, nebit-gazy gaýtadan işlenip alnan önümlerden, dökünlerden, plastmassadan we dokma materiallaryndan ybaratdygy aýdyldy. Öz gezeginde moldowa tarapy Türkmenistana esasan hem derman, azyk, himiýa önümleri we neşirýat materiallaryny eksport edýändigi bellenildi.

Söwda-senagat edarasynyň Prezidenti türkmen tarapy bilen hyzmatdaşlygy ösdürmek boýunça islegleriň bardygyny aýdyp, bu ugurda ulag we logistika meseleleriniň söwda dolanyşygynyň ösmegine belli bir kynçylyklary döredýändigini belledi.

Bu nukdaýnazardan, Ilçi biziň ýurdumyzyň ulag we üstaşyr taslamalarynyň ösüşine we diwersifikasiýasyna uly ähmiýet berýändigini aýtdy. Ulag we üstaşyr strategiýasynyň durmuşa geçirilmegi netijesinde Türkmenistan sebit we halkara derejesindäki möhüm ulag we logistika merkezi hökmünde öz ornuny yzygiderli güýçlendirýär, Türkmenbaşy deňiz portunyň logistika mümkinçiliklerinden peýdalanyp, esasy halkara logistika merkezi derejesine eýe bolup, bäsleşige ukyply önümlerini öndürýär we halkara bazarlaryna eksportyny işjeňleşdirýär, möhüm transport akymlaryny üpjün edýän taslamalara işjeň gatnaşýar, diýip Ilçi belledi. Onuň aýtmagyna görä, Türkmenistan, Azerbaýjan, Gruziýa we Rumyniýa döwletleriň gatnaşýan “Hazar deňzi - Gara deňiz” halkara üstaşyr we ulag geçelgesiniň durmuşa geçirilmeginiň bolsa, Ýewropa we Aziýa ýurtlarynyň arasyndaky söwda gatnaşyklaryna oñyn täsir etjekdigi nygtaldy.

T.Ataýew moldowa tarapyny Türkmenistanda we daşary ýurtlarda geçirilýän esasy çärelere işjeň gatnaşmaga, çagyryp, hususan-da, şu ýylyň 25-nji maýynda Aşgabatda geçiriljek Türkmen halysynyň baýramy mynasybetli haly we haly önümleriniň sergisine gatnaşmaga ozal hem çakylygyň iberilendigini aýdyp, bu çärelere gatnaşmaga çagyrdy.

Duşuşyga Türkmenistandaky hyzmatdaşlar bilen işjeň gatnaşyklary ýola goýan we maýa goýum forumlaryna gatnaşýan, oba hojalyk ekinlerini zyýanly mör-möjeklerden goraýan himiki serişdeleri öndürýän “Mezhtrans Moldova” kompaniýasynyň direktory Mihail Mokanu hem gatnaşdy.

Duşuşyga gatnaşyjylar ikitaraplaýyn söwda-ykdysady ösüşe möhüm maýa goýum hökmünde seredilýän köptaraplaýyn hyzmatdaşlygy dowam etdirmek arkaly Türkmen-Moldowan işewür hyzmatdaşlygyny işjeňleşdirmäge taýýardyklaryny yglan etdiler.