Türkmenistanyň Ukrainadaky Ilçihanasy tarapyndan guralan medeniýetleriň şygryýet dialogy

Her ýyl 21-nji martda bellenilýän Bütindünýä şygryýet gününi bellemek üçin, Türkmenistanyň Ukrainadaky Ilçihanasy türkmen diasporasynyň wekilleriniň we Ilçihananyň diplomatlarynyň gatnaşmagynda “Şygryýet sözleri bilen Medeniýetleriň Dialogy” atly şygryýet marafonyny geçirdi. Bu taslamanyň maksady baý şygryýet mirasy giňden ýaýmak we edebi däpleriň dialogy arkaly ýurtlaryň arasyndaky medeni we ynsanperwer gatnaşyklary berkitmekdir.

Marafonda Türkmenistanyň we Ukrainanyň ajaýyp nusgawy şahyrlary: Gurbandurdy Zelili, Seýitnazar Seýdi, Magtymguly Pyragy, Wladimir Sosýura, Lesýa Ukrainka we Taras Şewçenkonyň eserleri şöhlelendirildi.

Marafona gatnaşyjylar şygyr arkaly her bir millete degişli umumy mowzuklary beýan etdiler, medeni däpleri we ruhy gymmatlyklary birleşdirdiler. Çärede çuňňur pelsepewi we liriki temalar ýaýbaňlandyryldy. Ýagny, adam durmuşynyň geçginliligi we ruhy ýol görkezijileriň ähmiýeti, içki göreş, ruhuň güýji we durmuş saýlawlary, erkinlik, söýgi, ene duýgulary we ýagty geljege bolan umytlar beýan edildi. Poetik keşpler adamzat bilen tebigatyň arasyndaky çuňňur baglanyşygy, Garagum çölüniň keşbiniň azatlygyň, ýaşaýşyň we çäksiz giňişligiň nyşany hökmünde görkezdi.

Marafon Magtymguly Pyragynyň Kiýewiň merkezindäki ýadygärliginde onuň goşgusynyň ukrain dilindäki terjimesinde çeper okalmagy bilen jemlendi. Eser öňe ymtylyşy, batyrgaýlygy we saýlanan ýola wepalylygy alamatlandyrýan atyň we çapyksuwaryň şekilleri bilen dolduryldy.

Bu aýratyn goşgynyň saýlanmagy 2026-njy ýylyň Türkmenistanda «Garaşsyz, baky Bitarap Türkmenistan – bedew batly at-myradyň mekany» şygary astynda bellenilýändigini göz öňünde tutup, simwoliki ähmiýete eýedir. Türkmeniň buýsanjy we esasy milli nyşanlaryň biri bolan ýyndam atynyň keşbi eseriň mazmuny bilen tebigy ýagdaýda ýaňlanýar we medeni gymmatlyklaryň dowamlylygyny we olaryň häzirki zamandaky ähmiýetini nygtaýar.

Şeýle çäreleri geçirmek häzirki wagtda has-da möhümdir. Şygryýet marafony diňe bir medeni tanyşdyryş çäresi bolmak bilen çäklenmän, eýsem medeniýetara dialogy, özara düşünişmegi we halklaryň arasyndaky dostlugy berkitmek, baý edebi mirasy wagyz etmek, milli medeniýetleriň ruhy mümkinçiliklerini giňeltmek we nusgawy şygryýetde şöhlelenen ebedi gymmatlyklary açyp görkezmek üçin möhüm gurala öwrüldi.