TÜRKMENISTANYŇ ILÇISI MOLDOWA RESPUBLIKASYNYŇ DAŞARY IŞLER MINISTRLIGINIŇ DÖWLET SEKRETARY BILEN IKITARAPLAÝYN HYZMATDAŞLYGYŇ MESELESINI ARA ALYP MASLAHATLAŞDY

img
img
img
img
img
img

03.04.2025ý. senede Türkmenistanyň Ukrainadaky we Moldowa Respublikasyndaky Ilçisi Toýly Ataýewiň Moldowa Respublikasynyň Daşary işler ministrliginiň Döwlet sekretary Sergeý Mihow bilen duşuşygy geçirildi.

Moldowanyň Daşary işler ministrliginiň edara binasynda geçirilen duşuşykda taraplar ikitaraplaýyn hyzmatdaşlygyň köp meselelerini, syýasy gepleşikleri işjeňleşdirmek, şeýle hem hyzmatdaşlygyň wajyp meseleleri, şol sanda daşary syýasat, ykdysadyýet, söwda, ylmy we bilim, ynsanperwer, medeni gatnaşyklar we syýahatçylyk ýaly köp ugurlar boýunça meseleler ara alyp maslahatlaşdylar.

Duşuşygyň dowamynda taraplar iki ýurduň Daşary işler ministrlikleriniň arasynda syýasy geňeşmeleri we parlamentara geňeşmeleri işjeňleşdirmek meselesine aýratyn üns berdiler we geljek ýyllar üçin ýokary derejeli çäreleriň meýilnamasy boýunça ylalaşdylar. Hyzmatdaşlygyň esasy ugurlarynyň biri hökmünde seredilýän Söwda-ykdysady hyzmatdaşlyk boýunça türkmen-moldowan hökümetara toparynyň nobatdaky mejlisini geçirmek boýunça teklipler hem bu meýilnama girizildi.

Türkmenistanyň Ilçisi Daşary işler ministrligiň wekili bilen häzirki wagtda möhüm meseleleriň biri bolup durýan Türkmenistanyň raýatlaryna wiza ýardamlarynyň berilmegi bilen baglanyşykly meseläni hem ara alyp maslahatlaşdy, hem-de taraplar bu ugurda hyzmatdaşlygyň indiki ädimleri babatda ylalaşdylar.

Pursatdan peýdalanyp, taraplar BMG-niň çäginde halkara guramalara agza bolmak üçin saýlawlarda dostlukly ýurtlaryň dalaşgärlerini yzygiderli goldaw berýändikleri üçin minnetdarlyk bildirdiler. Şeýlelikde, ýurtlaryň arasynda ýokary derejedäki ynanyşmak we netijeli hyzmatdaşlygyň depgini bellenildi.

Türkmenistanyň Ilçisi ozal Moldowa Respublikasynyň Döwlet ýolbaşçysyna Türkmenistanyň Bitaraplygynyň 30 ýyllygy mynasybetli şu ýylyň 12-nji dekabrynda Aşgabat şäherinde geçiriljek wekilçilikli Halkara parahatçylyk we ynanyşmak ýyly Forumyna gatnaşmak üçin çakylygyň iberilendigini aýdyp, moldowa tarapynyň ýokary derejede gatnaşmagyna garaşylýandygyny mälim etdi.