MAGTYMGULYNYŇ GOŞGULARY POLÝAK DILINDE: NIKOLAÝ WASKIWIŇ MAKALASY «TÜRKMENISTAN» GAZETINDE

Esaslandyryjysy Türkmenistanyň Ministrler Kabineti bolup durýan "Türkmenistan" gazetiniň web sahypasynda Ýewropada, Aziýada we dünýäniň beýleki künjeklerinde beýik türkmen şahyry we akyldary Magtymguly Pyragynyň döredijiliginiň terjimelerine, gözleglerine we ýaýbaňlandyrmaga bagyşlanan makala çap edildi.

“Magtymgulynyň goşgulary polýak dilinde” atly makala Magtymgulynyň döredijiligini ýadawsyz öwreniji Taras Şewçenko adyndaky Kiýew milli uniwersitetiniň Ukrain dilini öwreniş ylmy-barlag institutynyň baş ylmy işgäri, professor Nikolaý Waskiwe degişlidir.

Professora meşhur polýak ýazyjysy Ýan Bžehwanyň (1898–1966) terjimeler kitabyny tapmak miýesser edipdir. Bellemeli ýeri, Ýan Bžehwa Ukrainanyň Žmerinka şäherinde doglupdyr.

Makalanyň awtory Magtymgulynyň döredijiliginiň polýak dilinde 1954-nji ýylda neşir edilen ilkinji we şu wagta çenli ýeke-täk kiçijik kitabydygy barada ýazýar. Bu kitap gysgaça giriş sözüni, Magtymgulynyň 12 sany şygryny we awtoryň belliklerini öz içine alýar. Kitapçanyň girişinde bolsa terjimeçi okyjylary türkmen nusgawy şahyrynyň ady, onuň döredijilik aýratynlyklary, eserleriniň poetik özboluşlylygy, gysgajyk görnüşinde şahyryň eserleriniň rus diline terjime edilişiniň taryhy bilen tanyşdyrýar. Goşgularyň terjimeleri barada aýdylanda bolsa, Ýan Bžehwa goşgy we gazal düzülişiniň žanr aýratynlyklaryny, strofa we rifma sazlaşygyny saklamaga çalşypdyr.

N.Waskiwiň bellemegine görä, Bžehwanyň bu terjimesi diňe Magtymgulyny we onuň eserlerini meşhurlamak bilen çäklenmeýär. Onuň gündogaryň we türkmen şygyrýetini hem-de Magtymgulynyň goşgy düzüş kämilligini doly derejede, ünsli we jikme-jik öwrenen ussat bolup çykandygy barada N.Waskiw ýazýar.