Türkmenistan “Merkezi Aziýa – Italiýa” Sammitiniň çäginde hyzmatdaşlygy pugtalandyrýar

Türkmenistanyň Prezidenti Serdar Berdimuhamedow anna güni Astana şäherinde geçirilen “Merkezi Aziýa – Italiýa” görnüşindäki birinji sammite gatnaşdy.

Saparyň dowamynda Türkmenistanyň Baştutany ikitaraplaýyn duşuşyklaryň birnäçesini geçirdi. Hususan-da, Gazagystan Respublikasynyň Prezidenti Kasym-Žomart Tokaýew bilen duşuşyk geçirildi. Mähirli we ynanyşmak ýagdaýynda geçen duşuşykda taraplar dostluk we doganlyk gatnaşyklaryny has-da pugtalandyrmak şeýle hem iki ýurduň arasyndaky köp ugurly hyzmatdaşlygy giňeltmek baradaky özara isleglerini tassykladylar. Şeýle hem, Türkmenistanyň döwlet Baştutany dostlukly ýurduň Prezidentini «Awaza» milli syýahatçylyk zolagynda geçiriljek BMG-niň deňze çykalgasy bolmadyk ösüp barýan ýurtlar boýunça üçünji maslahatyna gatnaşmak üçin Türkmenistana çagyrdy.

Şeýle hem Türkmenistanyň Prezidenti Italiýa Respublikasynyň Premýer-ministri Jorja Meloni bilen duşuşdy. Taraplar häzirki dialogyň türkmen-italýan gatnaşyklarynyň yzygiderli ösmegine goşant goşjakdygyna özara ynam bildirdiler. Prezident Serdar Berdimuhamedow Türkmenistanyň Ýewropa ýurtlary, şol sanda Italiýa bilen hyzmatdaşlygy pugtalandyrmaga uly ähmiýet berýändigini belledi.
“Merkezi Aziýa + Italiýa” formatyndaky birinji sammitiniň çäginde sebitiň döwlet Baştutanlary we Italiýa Respublikasynyň Ministrler Geňeşiniň Başlygy ykdysadyýet, energetika, howpsuzlyk we durnukly ösüş ugurlaryndaky hyzmatdaşlygy pugtalandyrmakdaky maksatlaryny berkitýän bilelikdäki jarnama gol çekdiler. Resminamada söwda-ykdysady gatnaşyklary giňeltmegiň, ulag geçelgelerini ösdürmegiň, şeýle hem bilelikdäki ekologik başlangyçlarynyň we suw serişdelerini dolandyrmak boýunça taslamalarynyň ähmiýeti nygtalýar. Jarnamanyň gol çekilmegi Türkmenistan bilen Italiýanyň arasyndaky hyzmatdaşlygy has-da pugtalandyrmak üçin esas döredýär şeýle hem sebitdäki durnuklylyga we ösüşe goşant goşýar.

Möhüm çeşmelere, durnukly ykdysady ösüşe we amatly geografiki ýagdaýa eýe bolan Italiýa bilen Merkezi Aziýa ýurtlarynyň arasyndaky hyzmatdaşlyk energetika, senagat, infrastruktura, şol sanda öňdebaryjy IT tehnologiýalary we maýa goýumlar ýaly ugurlarda bilelikdäki taslamalary durmuşa geçirmek üçin täze mümkinçilikler açýar.