Garabogazköl aýlagynyň üstünde gurlan 354 metrlik köpri ulanmaga berildi

Türkmenistanda Garabogazköl aýlagynyň üstünden geçýän awtomobil köprüsiniň dabaraly açylyşy boldy. Dabara ýurtda 3-nji noýabrda bellenilýän Gurluşyk we senagat toplumynyň işgärleriniň gününe gabat geldi.

Ukrainanyň «Altkom» jogapkärçiligi çäkli jemgyýeti gurluşyk potratçysy boldy. Köpri halkara hil standartlaryna, tehniki we ulanyş düzgünlerine laýyk gelýär.

Köpriniň uzynlygy 354 metr, ini bolsa 21 metr. Iki taraplaýyn platforma 40-50 tonna ýük göterijilikli ulaglary ýerleşdirmek üçin niýetlenendir. Onuň gurluşygynda sulfatlara çydamly sement, demir-beton konstruksiýalary we beýleki ýokary berk materiallar ulanyldy. Bu bolsa korroziýa, deformasiýa we seýsmiki ýüklere garşy durnuklylygy üpjün edýär.

Täze gurluş halkara ýük awtoulag gatnawlarynyň ýokary geçirijiligi üpjün etmek üçin niýetlenendir. Açylyş dabarasynda köpriniň sebit halklarynyň arasyndaky hoşniýetli goňşuçylygy we dostlugy alamatlandyrýandygy bellenildi.