KIÝEWDE TÜRKMEN BEDEWINIŇ MILLI BAÝRAMY MYNASYBETLI MEDENI WE BILIM SUNGAT ÇÄRESI GEÇIRILDI

26.04.2026 ý. Kiýew şäherindäki Magtymguly kitaphanasynda Türkmenistanyň Ukrainadaky Ilçihanasy paýtagtyň Swýatoşinsk etrabynyň bilim edaralary we döredijilik gurnaklary bilen bilelikde “Ahalteke aty: çeper keşplerde gözellik, ýyndamlyk we asyllylyk” atly interaktiw programma bilen uly möçberli medeni we bilim çäresini geçirdi.

Bu medeni çäre Türkmenistanda «Garaşsyz, baky Bitarap Türkmenistan – bedew batly at-myradyň mekany» diýlip yglan edilen ýylyň, ýurdumyzyň garaşsyzlygynyň şanly 35 ýyllygynynyň çäklerinde guraldy we türkmen halkynyň milli buýsanjynyň aýrylmaz nyşanlarynyň biri bolan Türkmen bedewiniň milli baýramy mynasybetli guraldy.

Çäräniň başynda myhmanlar, mekdep okuwçylar, sungat gurnagynyň agzalary, ene-atalar, Ilçihananyň wekilleri, türkmen ýaşlary we kitaphananyň işgärleri türkmen medeniýetiniň jümmüşine aralaşdylar. Çärede türkmen ýaşlarynyň janly ýerine ýetirmeginde milli saz gurallary bolan dutaryň we gyjagyň owazlary ýaňlandy, hem-de türkmen milli sazy, mowzuklaýyn wideolaryň görkezilişi we ajaýyp ahalteke at tohumyny suratlandyrýan sergi bilen utgaşdy. Şeýle hem türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň behişdi bedewlere bagyşlanan “Ahalteke bedewi - biziň buýsanjymyz we şöhratymyz”, “Gadamy batly bedew”, “Ganatly bedewler”, “Atda wepa-da bar, sapa-da” atly eserleriniň ukrain dilindäki neşirleri hödürlendi.

Ýaş suratkeşler tarapyndan döredilen ahalteke atlaryna bagyşlanan sungat eserleriniň sergisi çärä gatnaşyjylarda aýratyn gyzyklanma döretdi. Suratkeşler rowaýata öwrülen at tohumynyň gözelligi, nepisligi we asyllylygy baradaky öz garaýyşlaryny surat eserlerine siňdirdiler.

Magtymguly kitaphanasynyň direktory Ýuliýa Lopata gatnaşyjylaryň öňünde çykyş edip, medeniýetara gepleşikleri berkitmek we ýaş nesli dünýä medeni mirasyna hormat goýmak ruhunda terbiýelemek üçin şeýle çäreleriň geçirilmeginiň möhümdigini belledi.

Türkmenistanyň Ukrainadaky Ilçihanasynyň wekili ýurdumyzda döwlet derejesinde bellenilýän uly göwrümli baýramçylyklar, atçylyk ýaryşlary, atlaryň gözellik bäsleşikleri, sergiler we atçylygy ösdürmäge bagyşlanan ylmy-amaly maslahatlar bilen birlikde geçirilýän Türkmen bedewiniň milli baýramynyň taryhy we medeni ähmiýeti barada çykyş etdi. Ol bu gadymy sungatyň özboluşlylygynyň we dünýä ähmiýetiniň resmi taýdan ykrar edilendigini, 2023-nji ýylda Ahalteke atçylyk sungaty we atlary bezemek däpleriniň ÝUNESKO-nyň Adamzadyň maddy däl medeni mirasynyň sanawyna girizilendigini belledi.

Ilçihananyň işgäri Türkmenistan bilen Ukrainanyň arasyndaky medeni gatnaşyklary pugtalandyrmagyň möhümdigini we şeýle çäreleriň halklaryň arasynda dostlugy we medeni alyş-çalyşy ösdürmekdäki ornuny, şeýle hem ýaşlary öz dünýägaraýyşlaryny giňeltmäge, olary Türkmenistanyň baý mirasy bilen tanyşdyrmaga we döredijilik mümkinçiliklerini ösdürmäge kömek edýän medeni başlangyçlara çekmegiň möhümdigini nygtady.

“Ahalteke atlarynyň syrlary” atly interaktiw sorag-jogap çagalaryň arasynda uly gyzyklanma döretdi. Gatnaşyjylar berlen soraglara dogry jogap bermegi, olaryň çärä ýokary derejeli gatnaşygyny we türkmen atlary barada alan bilimlerini görkezýär.

Çärä gatnaşýan ýaş suratkeş Polina Kosinowa at çekmek boýunça ussatlyk sapagyny geçirip, atlary suratlandyrmagyň çeper usullaryny we öz döredijilik mümkinçiliklerini görkezdi.

Baýramçylygyň çäginde sungat sergisine gatnaşanlaryň ählisine hormat hatlary we ýadygärlik sowgatlary gowşurmak dabarasy geçirildi. Ahalteke atyny çekmekde iň ýokary ussatlygy we özboluşly garaýşy görkezen sungat bäsleşiginiň dürli ugurlary boýunça ýeňijileri hem sylaglandy.

Bu çäre türkmen halkynyň baý taryhy we medeni mirasyny görkezmek üçin ýene bir meýdança bolup hyzmat etmek bilen, ikitaraplaýyn medeni gatnaşyklaryň çuňlugyny we dostlukly halklaryň arasyndaky hyzmatdaşlygy mundan beýläk-de ösdürmegiň nyşanyna öwrüldi.