UKRAINADAKY TÜRKMEN ÝAŞLARY BÜTINDÜNÝÄ SAGLYK GÜNÜNI BELLEDILER

Ukrainanyň ýokary okuw jaýlarynda okaýan türkmen talyplary we türkmen diasporasynyň wekilleri Bütindünýä saglyk güni mynasybetli geçirilýän sport we saglyk çäresine gatnaşdylar.

Türkmenistanda bedenterbiýe-sport we medeni-köpçülikleýin çäreleriň dowam edýän günlerinde, Ukrainadaky türkmen ýaşlary sport hereketine işjeň we höwes bilen gatnaşyp, yzygiderli bedenterbiýe hereketleriniň we sagdyn durmuş ýörelgesiniň möhümdigini görkezdiler.

Şeýlelikde, 2025-nji ýylyň 5-nji aprelinde Türkmenistanyň Ukrainadaky Ilçihanasy ýapyk binalarda göreşiň dürli görnüşleri, armwresling, agyr atletika, gira galdyrmak, şeýle hem dürli agyrlykdaky ştangalary ýatyp we itekläp götermek boýunça ýaşlaryň arasynda ýaryşlary gurady. Çärä gatnaşyjylar dürli güýç emellerini, tizlikli we çydamly ylgamak ýaly türgenleşikleri ýerine ýetirip, çäräni küşt we şaşka oýnamak arkaly intellektual ýaryşlar bilen tamamladylar.

Çäre gatnaşyjylar sporty we sagdyn durmuş ýörelgelerini wagyz etmegiň fiziki we akyl saglygy üçin zerurdygyna ynanýarlar.

Türkmen ýaşlary bilen bäsleşen türkmen diplomatlary, biziň ýurdumyzyň fiziki taýdan güýçli, ruhy we aň taýdan ösen ýaş nesliň terbiýelenmeginiň esasan Türkmenistanyň jemgyýetçilik syýasatyna we halkyň saglygyny berkitmeklige gönükdirilen temmäki önümlerine garşy göreşmek we dünýäde temmäkiden azat sebitleri giňeltmek, milli sporty we häzirki zaman sport infrastrukturasyny ösdürmek işine goşant goşmak ýaly işleriň alnyp barylýandygyny nygtadylar.

Diplomatlar ýurdumyzyň olimpiýa hereketiniň ösmegine we ynsanperwerlik ýörelgeleriniň durmuşa geçirilmegine – dünýäde parahatçylygy we ynanyşmagy, ýurtlar bilen halklaryň arasyndaky dostlugy berkitmek üçin mynasyp goşant goşmagyny dowam etdirýändigini bellediler. Mälim bolşy ýaly, bu ýörelgeler “Türkmenistanyň Halkara parahatçylyk we ynanyşmak ýylynyň dowamyndaky işleriniň we onuň ileri tutýan ugurlarynyň Konsepsiýasynyň” esasyny düzýär.