Türkmenistan, Azerbaýjan we Merkezi Aziýa ýurtlary Awazada geçirilen duşuşygyň netijeleri boýunça bilelikdäki beýannama gol çekdiler

Şu gün «Awaza» milli syýahatçylyk zolagynda Merkezi Aziýa döwletleriniň we Azerbaýjan Respublikasynyň döwlet Baştutanlarynyň sekizinji Konsultatiw duşuşygynyň mejlisiniň jemleýji resminamalaryna gol çekmek dabarasy boldy.

Türkmenistanyň Prezidenti Serdar Berdimuhamedow, Azerbaýjanyň Prezidenti Ilham Aliýew, Gazagystanyň Prezidenti Kasym-Žomart Tokaýew, Gyrgyzystanyň Prezidenti Sadyr Žaparow, Täjigistanyň Prezidenti Emomali Rahmon we Özbegistanyň Prezidenti Şawkat Mirziýoýew «Merkezi Aziýa döwletleriniň we Azerbaýjan Respublikasynyň döwlet Baştutanlarynyň sekizinji Konsultatiw duşuşygynyň mejlisiniň Bilelikdäki beýannamasyna» gol çekdiler.

Şeýle hem olar «Merkezi Aziýa döwletleriniň we Azerbaýjan Respublikasynyň döwlet Baştutanlarynyň sekizinji Konsultatiw duşuşygynyň düzgünleşdiriji resminamalary hakynda Karara» gol çekdiler.

Türkmenistanyň Prezidenti Serdar Berdimuhamedow «Awaza» milli syýahatçylyk zolagynda geçirilen Merkezi Aziýa döwletleriniň we Azerbaýjanyň Baştutanlarynyň konsultatiw duşuşygynda eden çykyşynda ýurtlaryň ilkinji gezek resmi taýdan altytaraplaýyn görnüşde duşuşýandygyny belledi.

Türkmenistanyň Prezidentiniň bellemegine görä, Azerbaýjanyň bu görnüşdäki hyzmatdaşlyga goşulmagy döwletleriň köp ýyllaryň dowamynda doganlyk, hoşniýetli goňşuçylyk we hyzmatdaşlyk ýörelgelerine tarap alyp baran işleriniň, şeýle hem halklaryň ösüş we rowaçlyk ýolundan bilelikde ýöremek baradaky ymtylyşlarynyň amaly we dogry netijesi boldy.

Serdar Berdimuhamedow dünýäde we sebitde ýagdaýlaryň çalt üýtgeýändigini, täze şertleriň ýüze çykýandygyny nygtady. Onuň bellemegine görä, bu ýagdaý dogry we uzak möhletleýin çözgütleri işläp taýýarlamak üçin ünsli çemeleşmegi, ýagdaýlara sowukganly we obýektiw baha bermegi talap edýär. Döwlet Baştutanynyň pikiriçe, esasy ünsi hyzmatdaşlygy yzygiderli pugtalandyrmaga we döwletleriň mümkinçiliklerinden mümkin boldugyça netijeli peýdalanmaga gönükdirmek zerurdyr. Bu ugurlar daşary syýasaty, howpsuzlyk ulgamyny, ykdysady we söwda mümkinçiliklerini, şeýle hem ynsanperwer, ylmy we bilim ulgamlarynda toplanan tejribäni öz içine alýar.

Prezident häzirki wagtda ýurtlaryň hakykatdan-da giň gerimli strategik maksatlary öňde goýup bilýändigini aýtdy. Onuň sözlerine görä, ykdysadyýetleriň depginli ösmegi, olaryň diwersifikasiýalaşmagy, hil we tehnologik derejesiniň ýokarlanmagy özara bähbitli şertlerde işewür gatnaşyklary düýpli ösdürmäge mümkinçilik berýär.

Türkmenistanyň Prezidenti Merkezi Aziýanyň we Azerbaýjanyň möhüm logistika we energetika merkezleri hökmünde barha artýan ornuna ünsi çekdi. Onuň baha bermegine görä, bu ýagdaý Aziýadaky we Ýewropadaky hyzmatdaşlar bilen gatnaşyklary ösdürmek üçin giň mümkinçilikleri açýar. Üýtgewsiz ileri tutulýan ugurlaryň hatarynda ol umumy ruhy, medeni we gymmatlyk taýdan ýakynlygy pugtalandyrmagy, şeýle hem ynsanperwer hyzmatdaşlygyň gerimini giňeltmegi görkezdi.