TÜRKMENISTAN BILEN ÝEWROPA BILELEŞIGINIŇ HYZMATDAŞLYGYNYŇ 30 ÝYLLYGYNA BAGYŞLANAN METBUGAT MASLAHATY BARADA

2023-nji ýylyň 22-nji noýabrynda Ýewropa medeniýetiniň Türkmenistandaky günleriniň çäginde Türkmenistan bilen Ýewropa Bileleşiginiň arasyndaky hyzmatdaşlygyň 30 ýyllygyna bagyşlanan metbugat maslahaty ÝB-niň wekilhanasynyň binasynda geçirildi.

Türkmenistanyň Daşary işler ministriniň orunbasary M.Bäşimowa öz çykyşynda Türkmenistan bilen ÝB-niň hyzmatdaşlygynyň 30 ýyllygy mynasybetli Ýewropa Bileleşiginiň wekilhanasynyň işgärlerini gutlady we Türkmenistanyň Ýewropa Bileleşigi bilen syýasy-diplomatik, söwda-ykdysady, medeni-ynsanperwer ugurlardaky hyzmatdaşlyga uly ähmiýet berilýändigini nygtady.

Iň ýokary derejede geçirilýän yzygiderli duşuşyklaryň we gepleşikleriň ugurlaryň giň toplumy boýunça hyzmatdaşlygyň giňeldilmegine we pugtalandyrylmagyna goşant goşýandygy bellenildi. Şu nukdaýnazardan, 2023-nji ýylyň 18-nji sentýabrynda Nýu-Ýorkda Türkmenistanyň Prezidenti bilen Ýewropa Geňeşiniň Başlygynyň arasynda geçirilen duşuşygyň Türkmenistan bilen Ýewropa Bileleşigiň hyzmatdaşlygynda möhüm tapgyra öwrülendigi nygtaldy.

Türkmen tarapy parlamentara gepleşikleriň çäklerinde netijeli gatnaşyklary belledi. Bu ugurda Türkmenistanyň Mejlisiniň we Ýewropa Parlamentiniň wekilleriniň arasynda yzygiderli duşuşyklar barada nygtaldy.

“Merkezi Aziýa-Ýewropa Bileleşigi” hyzmatdaşlyk formaty hyzmatdaşlygy giňeltmekde möhüm gurallarynyň biri hökmünde bellenildi. Onuň çäklerinde söwda-ykdysady gatnaşyklary, ulag, sanlylaşdyrma, ekologiýa we energetika pudagyndaky hyzmatdaşlygy, şeýle hem medeni-ynsanperwer ulgamynda, şol sanda, bilim we saglygy goraýyş pudaklaryndaky hyzmatdaşlygy pugtalandyrmaga gönükdirilen maksatnamalar we taslamalar üstünlikli durmuşa geçirilýär.

Metbugat maslahatyna gatnaşyjylar gazanylan üstünlikler we geljekki hyzmatdaşlygyň mümkinçilikleri barada pikir alyşdylar.